poem, Ro Tawo Sa Buean

Ro Tawo Sa Buean
ni Melchor F. Cichon
May 4, 2020

Ro tawo sa buean nanaog
Ag dumeritso sa Kalibo
Agod mamati sa mga nagasadsad
Ku andang ginasingkit:
"Hala Bira, Pwera Pasma."
Bag-o imaw umagto sa Lezo,
Nag-agi anay si Tawong Buean
Sa gahaboe it "Queen of Philippine Fabrics."
Pag-abot ni Tawong Buean sa Poblacion it Lezo,
Nagtikang imaw paagto sa plasa
Kon siin na nakita ro Simbahan ni San Isidro.
Igto man nana nakita ro rebolto ni Dr. Jose Rizal
Nga nagatindog sa tunga it plasa.
Mayad eang ay naputoe eon
Ro mga gabueoeak nga mga halimunon
Sa anang palibot.
Bag-o imaw bumalik sa buean,
Si Tawong Buean hay nag-agi anay
Sa Bayangan Village kon siin ginabaeay ro kueon.
Agod indi imaw magutman sa anang pagpanaw,
Nag-agi anay imaw sa ginaeahaan it ampaw.
Kanugon owa ko imaw hiabuti.
Taw-an ko kunta imaw
Kang bag-ong ipo nga kapueapueang
Dragon Fruits.